Islom.uz

#Тарих

Мўғулларнинг Марказий Осиёга кириб келиши

(ҳижрий 656; милодий 1258 йил)

Мўғуллар Ўрта Осиё минтақасига мансуб ҳалқ бўлиб, уларнинг асл ватани Мўғулистон – Хитой тарафдаги ерлардир. Улар катта жамоалардан иборат бўлиб, турли-туман қабилаларга мансуб эдилар. Уларнинг ҳаммасини ҳижрий 603-624 (милодий 1206-1227) йилларда Чингизхон бирлаштирган ва қора қурумни ўзига пойтахт қилиб олган. Мўғуллар шафқатсизлиги, алдамчилиги билан танилган саҳровий кўчманчи қабилалардан иборат бўлган. Улар тажовузга, товламачиликка, кишиларнинг қонини тўкишга ниҳоятда ўч, дуч келган нарсани, ҳатто ит гўштини ейишдан ҳам қайтмайдиган халқ эди. Уларнинг ичида бутларга, юлдузларга, қуёшга сиғинадиганлари ҳам, ибоҳийлик – «ҳамма нарса мумкин», деган эътиқодга амал қиладиганлари ҳам жуда кўп бўлган.

XIII асрнинг бошларига келиб (1206-1215) Мўғулистонда Чингизхон ҳукмронлигида кўчманчи мўғулларнинг улкан давлати пайдо бўлди. Бу даврда Ўрта Осиё ҳудудларида Хоразмшоҳлар давлати мавжуд бўлиб, ўзаро урушлар ва ўзбошимчалик, бебошлик оқибатида бу қудратли салтанат инқирозга юз тута бошлаган эди. Чингизхон билан Муҳаммад Хоразмшоҳ ўртасида қисқа муддат (1215-1218) давом этган элчилик муносабатлари охир-оқибат фожиали тугади. Ҳарбий жиҳатдан пухта тайёргарлик кўрган мўғул қўшинлари хоразмшоҳлар давлатидаги иқтисодий, сиёсий ва ижтимоий тушкунлик вазиятидан фойдаланиб, қисқа муддатда (1218-1221) Ўрта Осиё ерларини босиб олдилар.

🔗 Тўлиқ ўқиш

Дин ишлари бўйича қўмитанинг 2023 йил 14 мартдаги 03-07/1733-сонли хулосаси

🕋 @islomuz

#Жамият

Энг мўъжаз араб давлати

Маълумки, Араб давлатлари лигаси – Ғарбий Осиё ва Шимолий Африкада жойлашган, аҳолисининг асосий қисми араб тилида сўзлашадиган мамлакатларни бирлаштирувчи нуфузли ташкилот бўлиб, айни кунда унинг 22 та аъзоси бор. 1945 йилда Мисрда таъсис этилган ушбу халқаро ташкилот давлатларининг умумий ер майдони бугунги кунда 13,5 миллион квадрат километрни ташкил этади. Қуйидаги мақолада мазкур ташкилотнинг ҳудудий жиҳатдан энг кичик мамлакати – Баҳрайн ҳақида сўз юритамиз.

Географияси ва тарихи

Баҳрайн Қироллиги – Форс кўрфази жанубида жойлашган бўлиб, давлатнинг 83 фоиз ҳудудини эгаллаган Баҳрайн номли орол ҳамда унинг атрофига «сочилиб» кетган 50 дан ортиқ табиий ва 30 дан зиёд сунъий оролчалардан таркиб топган. Давлатнинг умумий ҳудуди 786 квадрат километрни ташкил этади. Солиштириш учун: юртимиздаги Бешариқ ёки Паркент каби ўртача катталикдаги туманлар шундай ҳудудга эга.

Ана шундай мўъжаз мамлакат бир қатор салоҳиятларга эга бўлиб, бугунги кунда нефть-газ қазиб чиқариш, шунингдек, сайёҳлар ҳамда инвестицияларни жалб этиш (яъни туризм ҳамда иқтисодиётни ривожлантириш) кўрсаткичлари бўйича дунёнинг кўплаб давлатларини ортда қолдириб келмоқда. Қатар яримороли ва Саудия Арабистонининг шимоли-шарқий қирғоқлари ўртасида жойлашган Баҳрайн ороли қитъа (Арабистон яримороли) билан 25 километрли йўл – Қирол Фаҳд кўприги орқали боғланган.

🔗 Тўлиқ ўқиш

Дин ишлари бўйича қўмитанинг 2026 йил 14 майдаги 03/07/4229-сонли хулосаси

🕋 @islomuz

Ўзбекистон президенти «The Muslim 500» рейтингида эътироф этилди

Ўзбекистон Республикаси Президенти Шавкат Мирзиёев «The Muslim 500 – The World's 500 Most Influential Muslims» халқаро нашрининг 2027 йилги рейтингида дунёнинг энг нуфузли 50 нафар мусулмони қаторига киритилди. Шунингдек, давлат раҳбарлари ва сиёсатчилар йўналишида ҳам алоҳида эътироф этилди.

Мазкур рейтинг Иорданиянинг Амман шаҳрида фаолият юритувчи Қироллик ислом стратегик тадқиқотлар маркази (RISSC) томонидан ҳар йили тайёрланади. Унда мусулмон дунёси сиёсий, иқтисодий, диний, илмий ва маданий ҳаётига сезиларли таъсир кўрсатаётган шахслар ўрин олади.

Нашрда давлатимиз раҳбарининг иқтисодий ислоҳотлар, халқаро ҳамкорлик, минтақавий дипломатия, таълим ва маданият соҳаларидаги ташаббуслари, шунингдек, исломий меросни асраб-авайлаш ва ривожлантириш борасидаги саъй-ҳаракатлари алоҳида ёритилган.

Бу эътироф Ўзбекистоннинг халқаро майдондаги нуфузи, мусулмон дунёси билан ҳамкорлиги ва мамлакатимизда амалга оширилаётган ислоҳотларга берилаётган халқаро баҳодир.

Батафсил: themuslim500.com

🕋 @islomuz