የብሔራዊ ስትራቴጂ ሚኒስቴር | Ministry of National Strategy - Ethiopia

‹‹ቅድመ ማስጠንቀቂያ ሥርዓቶችን ማጠናከር የአየር ንብረት ለውጥ አደጋዎች የመቋቋም አቅምን ለመገንባት ወሳኝ ነው›› የብሔራዊ ስትራቴጂ ሚኒስትር በረከት ፍስሃፅዮን
የብሔራዊ ስትራቴጂ ሚኒስትር በረከት ፍስሀጽዮን ከCOP31 ጉባኤ ጎን ለጎን “የአፍሪካን የቅድመ ማስጠንቀቂያ ሥርዓቶች ማፋጠን እና ለተለያዩ አደጋዎች የመቋቋም አቅሟን ማጠናከር” በሚል መሪ ሀሳብ በተካሄደ ውይይት ላይ ተሳትፈዋል።
ሚኒስትሩ በመድረኩ ላይ ባደረጉት ንግግር የአደጋ ትንበያዎችን ወደ ተግባራዊ የቅድመ መከላከል እርምጃ መቀየር ያለውን ወሳኝነት አጉልተው አስረድተዋል።
በተጨማሪም ለአየር ንብረት ለውጥ አደጋዎች ተጋላጭ የሆኑ ማኅበረሰቦችን ለመጠበቅ፦
· የዝግጁነት አቅምን ማሳደግ
· የአየር ንብረት መረጃ ተደራሽነትን ማሻሻል እና
· ዘላቂ የፋይናንስ ምንጮችን ማሰባሰብ ላይ ትኩረት ሰጥቶ መስራት እንደሚገባ አብራርተዋል።

የብሔራዊ ስትራቴጂ ሚኒስትር በረከት ፍስሀጽዮን ከኤንዲሲ አጋርነት ድርጅት ዓለም አቀፍ ዳይሬክተር ፓብሎ ኤ. ቪዬራ (ዶ/ር) ጋር ተወያዩ

የኢትዮጵያ ብሔራዊ ስትራቴጂ ሚኒስትር በረከት ፍስሀጽዮን በአንታሊያ ቱርክ እየተካሄደ ባለው 31ኛው የተባበሩት መንግሥታት የአየር ንብረት ጉባኤ (COP31) ከኤንዲሲ አጋርነት ድርጅት (NDC Partnership) ዓለም አቀፍ ዳይሬክተር ዶ/ር ፓብሎ ኤ. ቪዬራ ጋር በኢትዮጵያ ፓቪሊዮን የሁለትዮሽ ውይይት አካሄዱ። ውይይቱ ኢትዮጵያ በኅዳር 2020ዓ.ም ለምታስተናግደው 32ኛው የአየር ንብረት ጉባኤ (COP32) ዝግጅት አንጻር ስትራቴጂያዊ ትብብርን ለማጠናከር ያለመ ነው።

ሚኒስትሩ ኢትዮጵያ ከ2009 ጀምሮ የድርጅቱ አባል በመሆን እያገኘች ላለው የረጅም ጊዜ ድጋፍ አድናቆታቸውን ገልጸዋል። ድጋፉ በተለይም በብሔራዊ የአየር ንብረት ለውጥ ምላሽ እቅድ (NDCs) እና የረጅም ዘመን የዝቅተኛ የልማት ስትራቴጂ (LT-LEDS) ሰነዶች ዝግጅትና ትግበራ፣ በአየር ንብረት አስተዳደር፣ በተቋማዊ አቅም ግንባታ፣ በግልጽነት ሥርዓት እና በንጹህ ኃይል ዘርፎች የተገኘውን አስተዋጽኦ አድንቀዋል።

በውይይቱ የኢትዮጵያን የNDC 3.0 ትግበራ (NDC 3.0 implementation) ፣ የአየር ንብረት ፋይናንስና ኢንቨስትመንት ማሰባሰብ፣ የካርቦን ገበያ ልማት፣ የአየር ንብረት ለውጥ የመቋቋም አቅም ማጠናከር እንዲሁም ተቋማዊ አቅም ግንባታ ላይ ትብብሩን ወደ ተሻለ ስትራቴጂያዊ ደረጃ የማሸጋገር አስፈላጊነት በሁለቱም ወገኖች ተጠቁሟል።

ዶ/ር ፓብሎ በበኩላቸው ድርጅቱ ከኢትዮጵያ ጋር ያለውን የረጅም ጊዜ ትብብር ይበልጥ ለማጠናከርና ለCOP32 ዝግጅት ድጋፉን ለማሳደግ ያለውን ቁርጠኝነት አረጋግጠዋል።

#Ethiopia #Turkiye #Antaliya #COP31

‹‹ደኖች ለአየር ንብረት ለውጥ መቋቋም፣ ለብዝኃ ሕይወት ጥበቃ እንዲሁም ለአረንጓዴ የሥራ ዕድል ፈጠራ ወሳኝ ሚና አላቸው፡፡›› በረከት ፍስሀፅዮን የብሔራዊ ስትራቴጂ ሚኒስተር

« የአየር ንብረት ለውጥን በመቋቋም ረገድ የደኖች አስተዋጽኦ» በሚል መሪ ሀሳብ በተካሄደው የCOP31 የመሪዎች መድረክ ላይ ኢትዮጵያ ዓለም አቀፍ የደን ልማትና የአየር ንብረት እርምጃዎችን ለማላቅ ያላትን ጽኑ ቁርጠኝነት ዳግም አረጋግጣለች።

በመድረኩ ላይ ንግግር ያደረጉት የብሔራዊ ስትራቴጂ ሚኒስትር በረከት ፍስሐጽዮን፣ ከ2011 ጀምሮ ኢትዮጵያ ከ56 ቢሊዮን በላይ ችግኞች የተተከሉበት የአረንጓዴ ዐሻራ መርሐ ግብር ያስገኘውን መሠረታዊ ለውጥ አጉልተው አንስተዋል፡፡

ደኖች ለአየር ንብረት ለውጥ መቋቋም፣ ለብዝኃ ሕይወት ጥበቃ፣ ለዘላቂ መተዳደሪያ እንዲሁም ለአረንጓዴ የሥራ ዕድል ፈጠራ ያላቸውን ወሳኝ ሚናም አብራርተዋል።

ኢትዮጵያ የመጪው የCOP32 አስተናጋጅ ሀገር እንደመሆኗ መጠን፣ ኢትዮጵያ የደን ሥነ-ምህዳር መልሶ ማልማትን ለማፋጠን እና እ.ኤ.አ. በ2030 የደን መጨፍጨፍን የመግታትና የመቀልበስ ግብን ለማሳካት፣ የተጠናከረ ዓለም አቀፍ አጋርነት፣ ኢንቨስትመንት እና የጋራ ርብርብ እንዲደረግ ጥሪ አቅርባለች።