تكنولوبيا

إحنا بنتكلم عن تغيير قيادة واحدة من أهم الشركات اللي بتتحكم في مستقبل صناعة الذكاء الاصطناعي عالمياً، وفي توقيت فيه صراع سياسي واقتصادي وتكنولوجي ضخم بين أميركا والصين.
وعشان كده، أنا شايف إن اسم الشخص اللي هيقعد على كرسي جينسن هوانغ ممكن يقول لنا حاجات كتيرة جداً عن شكل المرحلة الجاية، مش بس بالنسبة لإنفيديا، لكن لسوق الذكاء الاصطناعي كله.

والحقيقة إن الوضع ده مش وليد النهاردة، ولا حتى ظهر فجأة مع طفرة ChatGPT والذكاء الاصطناعي. لأ، ده مسار جينسن هوانغ نفسه بدأ يبنيه من سنين طويلة جداً.
تعالى أرجع بيك شوية لورا، وتحديداً لسنة 2006 تقريباً.
في الوقت ده، جينسن كان من أوائل الناس اللي فهمت إن مستقبل إنفيديا مش المفروض يفضل محصور في إنها شركة بتصنع كروت شاشة للألعاب، أو GPUs وخلاص.
الراجل كان شايف إن المعالجات دي ممكن استخدامها يتوسع بشكل ضخم جداً، وإنها مش بس معمولة عشان تشغل الجرافيكس والألعاب، لكن ممكن تعتمد عليها في معالجة أنواع مختلفة من البيانات، وبسرعات وقدرات حوسبة تتفوق على معالجات الـ CPUs التقليدية في أنواع معينة من المهام.
ومن هنا بدأ يفكر في أسواق تانية خالص، زي السيارات الذكية، والحوسبة المتطورة، وبعدها بسنين، وتحديداً من 2015 و2016، بدأ يدخل بشكل أقوى في مجالات زي التعلم العميق Deep Learning والتعلم المعزز Reinforcement Learning، وكل المجالات البحثية اللي كانت وقتها بتبني الأساس لثورة الذكاء الاصطناعي اللي إحنا عايشينها دلوقتي.
واللي لازم نقف عنده هنا إن جينسن هوانغ ما كانش بيستنى السوق لما يكبر وينضج وبعدين يدخل يستثمر فيه. لأ، ده كان بيعمل العكس تماماً!
كان بيروح يستثمر في المجالات دي وهي لسه مجرد أبحاث في المعامل والجامعات، ولسه ما وصلتش حتى لمرحلة إنها تتحول لصناعة حقيقية بمليارات الدولارات.
وبالتالي، لما السوق يبدأ يكبر ويوصل لمرحلة النضج، أو الـ Maturity، تكتشف إن إنفيديا أصلاً موجودة هناك من سنين، ومستقرة، وعندها المعالجات والمنصات البرمجية والأدوات اللي الشركات والباحثين محتاجينها عشان يشتغلوا.
فالنتيجة الطبيعية إن أي شركة جديدة عايزة تدخل السوق بتلاقي نفسها تقريباً مضطرة تتعامل مع إنفيديا، لأنها موجودة في قلب الصناعة من قبل حتى ما الصناعة نفسها تتولد بشكلها الحالي.
وده اللي أنا شايفه واحد من أهم أسرار نجاح جينسن هوانغ.
الراجل كان عنده بعد نظر غير طبيعي، وقدرة إنه يشوف السوق رايح فين قبل ما باقي الشركات حتى تبدأ تفكر في الموضوع. وبالتالي قدر يحول إنفيديا من مجرد شركة كروت شاشة لشركة مسيطرة على سوق الـ GPUs، وليها هيمنة ضخمة على سوق الحوسبة المتطورة عموماً.
بس في نفس الوقت، النجاح ده نفسه خلق وضع احتكاري صعب جداً، وبقى فيه اعتماد مبالغ فيه من الشركات على إنفيديا، وده وضع مش صحي للمنافسة على المدى الطويل.
طيب بعد كل الكلام ده، نرجع بقى للسؤال اللي بدأنا بيه: مين المفروض يمسك إنفيديا بعد جينسن هوانغ؟
أنا شايف إن الشركة دلوقتي مش محتاجة مجرد مهندس عبقري، ولا شخص فاهم في المعالجات والرقائق، لأن إنفيديا بالفعل عندها فرق هندسية وبحثية من أقوى الفرق في العالم.
هي محتاجة حد يعرف يلعب سياسة!
شخصية تعرف تتعامل مع ترامب، وتفهم الصين وشي جين بينغ، وتعرف تفتح أسواق مقفولة، وتفاوض حكومات، وتدير علاقات سياسية واقتصادية شديدة التعقيد، من غير ما تدخل الشركة في صدامات جديدة.
وعشان كده أنا شايف إن شخصية زي تيم كوك، المدير التنفيذي لأبل، هي أقرب نموذج لنوعية القيادة اللي إنفيديا محتاجاها حالياً.
ليه تيم كوك تحديداً؟
لأن الراجل عنده خبرة كبيرة جداً في التعامل مع الصين، وعارف إزاي يدير مصالح شركة أميركية عملاقة، وفي نفس الوقت يحافظ على علاقات مع بكين وواشنطن، حتى في عز التوترات السياسية والتجارية بين البلدين.
وده بالضبط النوع من المهارات اللي إنفيديا محتاجاه في المرحلة الجاية.
فيه كمان سيناريو تاني، وهو إن الشركة تجيب حد من قلب صناعة المعالجات نفسها، زي قيادات من AMD أو ARM.
وده مش مجرد احتمال أنا بفكر فيه وخلاص، لأن فاينانشال تايمز كانت اتكلمت بالفعل عن مناقشات داخل مجلس إدارة إنفيديا بخصوص رينيه هاس Rene Haas، المدير التنفيذي لشركة ARM، وإمكانية إنه يسيب منصبه وينتقل لقيادة إنفيديا.
والاختيار ده لو حصل هيبقى منطقي جداً من زاوية إن هاس فاهم صناعة المعالجات كويس جداً، وعنده خبرة في إدارة شركة موجودة تقريباً في قلب صناعة الرقائق العالمية، وبتتعامل مع عدد ضخم من شركات التكنولوجيا الكبرى.
بس أنا برضه مش مستبعد خالص إن إدارة ترامب نفسها يكون ليها دور في اختيار المدير التنفيذي الجديد لإنفيديا.
وبالعكس، أنا شايف إن ده احتمال يستحق التفكير فيه بجد، خصوصاً لو ترامب فعلاً شايف إن تغيير جينسن فرصة لإعادة ترتيب علاقة إنفيديا بالصين، ووضع قيادة جديدة تقدر تحقق مصالح الشركة والمصالح الأميركية في نفس الوقت.
ومش هتبقى مفاجأة بالنسبة لي لو لقينا الشخص الجديد ده جاي من قلب إنتل نفسها!
وفي النهاية، خلينا نشوف الأيام الجاية هتوصلنا لإيه، لأن اللي بيحصل في إنفيديا دلوقتي مش مجرد تغيير مدير تنفيذي في شركة تكنولوجيا كبيرة.