House of Peoples' Representatives of FDRE

ዜና ዕረፍት
----------------
የቀድሞ የምክር ቤት አባል የነበሩት አቶ ዮሐንስ ካሳሁን ከዚህ ዓለም በሞት ተለዩ።

አቶ ዮሐንስ ካሳሁን በ5ኛው የኢፌዴሪ የህዝብ ተወካዮች ምክር ቤት የሸካ ዞን ቴፒ ምርጫ ክልልን ህዝብን ወክለው አገልግለዋል።

አቶ ዮሐንስ ካሳሁን ከአባታቸው ከአቶ ካሳሁን ማሞ እና ከእናታቸው ከወ/ሮ ማርታ ቶጋ በ1974 ዓ.ም በሸካ ዞን የኪ ወረዳ፣ ሻይ ቀበሌ፣ ኩራች መንደር ተወለዱ።

አቶ ዮሐንስ ከ1ኛ እስከ 7ኛ ክፍል ትምህርታቸውን በቴፒ ሙሉ አንደኛ ደረጃ ትምህርት ቤት ተምረዋል። በመቀጠልም የሁለተኛ ደረጃ ትምህርታቸውን በአርባ ምንጭ አዳሪ ትምህርት ቤት ተከታትለዋል።

አቶ ዮሐንስ ካሳሁን ለትምህርትና ለሙያ እድገት የነበራቸውን ቁርጠኝነት በማሳየት በመምህርነት ዲፕሎማ እንዲሁም በማኔጅመንት የመጀመሪያ ዲግሪያቸውን ከሲቪል ሰርቪስ ዩኒቨርሲቲ አግኝተዋል።

በሙያዊና በአመራር ሕይወታቸውም በመምህርነት በማገልገል ጀምረው፣ በዞኑ መዋቅር በመምሪያ ኃላፊነት ድረስ አገልግለዋል።

አቶ ዮሐንስ በ5ኛ ዙር ሀገር አቀፍ ምርጫ በሸካ ዞን ቴፒ ምርጫ ክልልን ወክለው ለፓርላማ በመወዳደር የህዝብ ተወካዮች ምክር ቤት አባል በመሆን ህዝባቸውን አገልግለዋል።

በመጨረሻም የዞኑ ምክር ቤት ዋና አፈ ጉባኤ በመሆን ለሕዝባቸውና ለዞኑ እድገት ለበርካታ ዓመታት በኃላፊነት ሲያገለግሉም ነበር።

አቶ ዮሐንስ በ1996 ዓ.ም ትዳር የመሠረቱ ሲሆን ፤ በትዳራቸውም ሁለት ወንድና ሁለት ሴት በድምሩ አራት ልጆችን አፍርተው ነበር።

አቶ ዮሐንስ ካሳሁን ህዳር 4 ቀን 2019 ዓ.ም በ45 ዓመታቸው ከዚህ ዓለም በሞት የተለዩ ሲሆን፤ የቀብር ስነ-ስርዓታቸውም በሸካ ዞን የኪ ወረዳ በአዲስ ብርሃን ቀበሌ ወዳጅ ዘመዶቻቸውና ወዳጆቻቸው በተገኙበት ተፈፅሟል።

የኢፌዴሪ የህዝብ ተወካዮች ምክር ቤትም በአቶ ዮሐንስ ካሳሁን ህልፈት የተሰማውን ሀዘን እየገለጸ፤ ለሟች ቤተሰቦች፣ ለወዳጅ ዘመዶች በሙሉ መፅናናትን ይመኛል።

የተዘጋጀው መነሻ ዕቅድ ጥራት ያላቸው ሕጎችን ለማውጣት እንደሚጠቅም ቋሚ ኮሚቴው ገለጸ
‎--------------------
‎(ዜና ፓርላማ) ህዳር 04፣ 2019 ዓ.ም፣ አዲስ አበባ፤ የተዘጋጀው መነሻ ዕቅድ ጥራት ያላቸው ሕጎችን ለማውጣት እንደሚጠቅም በሕዝብ ተወካዮች ምክር ቤት የሕግና ፍትህ ጉዳዮች ቋሚ ኮሚቴ ገልጿል፡፡

የቋሚ ኮሚቴው ምክትል ሰብሳቢ የተከበሩ አቶ ታርጃት ደቦል ይህንን የገለጹት በ2019 በጀት ዓመት መነሻ ዕቅድ ላይ ከቋሚ ኮሚቴው ንዑሳን ኮሚቴ ሰብሳቢዎችና ለቋሚ ኮሚቴው ድጋፍ ከሚያደርጉ ባለሙያዎች ጋር ባደረጉት ውይይት ወቅት ነው፡፡

የተከበሩ አቶ ታርጃት ደቦል በመነሻ ዕቅዱ ላይ በሰጡት አስተያየት ጥራት ያላቸውን ሕጎች ለማውጣትና ሕዝቡን ተጠቃሚ ለማድረግ ከቋሚ ኮሚቴው ንዑሳን ኮሚቴ ሰብሳቢዎች የተነሱትን አስተያየቶችን በማካተት መነሻ ዕቅዱን ማዳበር እንደሚያስፈልግ ተናግረዋል፡፡

ምክትል ሰብሳቢው አክለውም የተዘጋጀው መነሻ ዕቅድ የምክር ቤቱን ተልዕኮዎች፣ የቋሚ ኮሚቴውን ነባራዊ ሁኔታ ፣ ቋሚ ኮሚቴው የሚከታተላቸውን ባለድርሻ አካላትና ታላቁን የመደመር ስትራቴጂ ዕቅድ መነሻ በማድረግ  መዘጋጀቱን ጨምረው አብራርተዋል፡፡

አያይዘውም ምክር ቤቱ የሚሠራቸው ዋና ዋና ተግባራት ሕግ ማውጣት፣ የሕዝብ ውክልና ሥራን መሥራት፣ ክትትልና ቁጥጥር ማድረግና የፓርላማ ዲፕሎማሲ ሥራዎችን መሥራት በመሆናቸው የሕግና ፍትህ ጉዳዮች ቋሚ ኮሚቴ በእነዚህ ላይ ትኩረት ሰጥቶ ለመሥራት መነሻ ዕቀዱን ካዘጋጀ በኋላ ተደጋጋሚ ውይይት እያደረገ መሆኑንም ጠቁመዋል፡፡

የቋሚ ኮሚቴው አባላት በመነሻ ዕቅዱ ላይ ቢካተቱ ወይም ቢስተካከሉ ያሏቸውን ሐሳቦችን ያነሱ ሲሆን የተሰጡት አስተያየቶች ጠቃሚ በመሆናቸው መነሻ ዕቅዱን ለማዳበር የሚካተቱ መሆናቸውንም ተጠቁሟል፡፡

መነሻ ዕቅዱ በአራት ክፍሎችና በስድስት ግቦች የተዘጋጀ በመሆኑ መነሻ ዕቅዱ በቋሚ ኮሚቴው ጸድቆ ወደ ተግባር ሲገባ ውጤት በማስመዝብ ሕዝቡን ተጠቃሚ ማድረግ እንደሚቻል ከቀረበው ማብራሪያ ማወቅ ተችሏል፡፡

(በ ጋሹ ይግዛው)

ተጨማሪ መረጃዎችን ለማግኘት፡-
በፌስቡክ http://www.facebook.com/hoprparliament
በዩቲዩብ
https://www.youtube.com/@FDREHOPR
በቴሌግራም
https://t.me/ParlamaNews
በትዊተር
http://twitter.com/fdrehopr
በዌብሳይት
www.hopr.gov.et ይከታተሉ።

ኢትዮጵያና ካናዳ ዲፕሎማሲያዊ ግንኙነታቸውን ወደ ተጨባጭ የኢኮኖሚ ትብብር ለማሸጋገር ተወያዩ
-------------------
(ዜና ፓርላማ) ህዳር 04 ፣ 2019 ዓ.ም፤ አዲስ አበባ፤ ኢትዮጵያና ካናዳ ባለፉት ስድስት አስርት ዓመታት የቆየውን ታሪካዊ ግንኙነታቸውን ይበልጥ አጠናክረው ለመቀጠል እና ዲፕሎማሲያዊ ግንኙነታቸውን ወደ ተጨባጭ ሁለንተናዊ ትብብር ለማሸጋገር መክረዋል።

ይህ ውይይት የተደረገው በሕዝብ ተወካዮች ምክር ቤት የውጭ ግንኙነትና የሰላም ጉዳዮች ቋሚ ኮሚቴ ሰብሳቢ በሆኑት በተከበሩ ዲማ ነጎ (ዶ/ር) እና በኢትዮጵያ የካናዳ አምባሳደር ኒኮላስ ሲማርድ መካከል ነው።

የተከበሩ ዲማ ነጎ (ዶ/ር) በውይይቱ ወቅት እንደገለጹት፣ በአፍሪካ ቀንድ ያለው የሰላምና ደህንነት ሁኔታ የተቀናጀ ቀጠናዊና ዓለም አቀፍ ትብብርን እንደሚጠይቅ አስረድተዋል።

በኢትዮጵያ የካናዳ አምባሳደር ኒኮላስ ሲማርድ በበኩላቸው፣ የአፍሪካ ቀንድ ሰላምና መረጋጋት ለቀጠናው ማህበረሰብ ደህንነት ብቻ ሳይሆን ለኢንቨስትመንት፣ ለንግድና ለኢኮኖሚ ዕድገት መሠረታዊ ቅድመ ሁኔታ መሆኑን አብራርተዋል።

ካናዳ የንግድ አጋርነቷን በማስፋትና ከተለያዩ የዓለም ሀገራት ጋር ያላትን ኢኮኖሚያዊ ትስስር በማጠናከር ላይ ትኩረት ሰጥታ እየሰራች መሆኑን ገልጸው፤ ይህም ከኢትዮጵያ ጋር ያላትን የአየር ትራንስፖርት፣ የማዕድን፣ የግብርናና በጤና ዘርፎች ያለውን የጋራ ትብብር ለማሳደግ ዕድል እንደሚፈጥር አስረድተዋል።

ሁለቱ ሀገራት ያላቸው የ60 ዓመታት የዲፕሎማሲ ግንኙነት በልማት ድጋፍ፣ በጤና፣ በትምህርትና በሴቶች እኩልነት ዘርፎች ውጤታማ ትብብር ያስገኘ መሆኑን አምባሰደሩ አስታውሰው፣ ወደፊትም ከልማት ድጋፍ ባለፈ በጋራ ጥቅም ላይ የተመሠረተ የኢኮኖሚ አጋርነትን ለማጠናከር ያላቸውን ፍላጎት ገልጸዋል።

የፓርላማ ዲፕሎማሲ፣ የሀገራትን የብሔራዊ ጥቅም ማስጠበቂያ፣ የኢኮኖሚ አጋርነት ማስፋፊያና የቀጣናዊ ሰላም ማጠናከሪያ መድረክ መሆኑም በውይይቱ ወቅት ተገልጿል።

(በሚፍታህ ኪያር)

ተጨማሪ መረጃዎችን ለማግኘት፡-
በፌስቡክ http://www.facebook.com/hoprparliament
በዩቲዩብ
https://www.youtube.com/@FDREHOPR
በቴሌግራም
https://t.me/ParlamaNews
በትዊተር
http://twitter.com/fdrehopr
በዌብሳይት
www.hopr.gov.et ይከታተሉ።