الشاعرة ام زينب كربلاء

فزاعيه بدايتها نعي لزهراء ع
جريت ونه اتهدم الحيل
اذكر فاطمه والمدمع ايسيل
ليش الزجيه شالت. بليل

نزلت الفزاعيه
ليش ام الحسن باليل دفنوها
غضبانه عله البالباب عصروها
……..
تون وحملت بليل. زعلانه
بسمار بضلعها ومشت غضابه
تضيعون الكبر. وصت الدفانه
تريد الخذو حكها. مايشيعوها
……..
ماتت فاطمه من جور اعاديها
ياضيعت كبرها شاهده عليها
وصت والوصيه بليل وديها
لبوها تشتكي كوم التولوها
……..
تالي اليل وصت ياعلي خذوني
مكسورة ضلع للكبر. ودوني
واكله يامحمد سطرو عيوني
كسرولي الضلع والدار حركوها
…….
هدو عله الدار وعالو عليه
وابني عالثره وادماه مجريه
يبويه حيدره تكيد بالاوصيه
تجري دمعة. الكرار خلوها
……..
ضلت فاطمه لليوم محزونه
وعليها اليحبها تجري عيونه
كبرج وين. واحبابج. يزورونه
عله الضايع كبرها العين هلوها
هوسه ختاميه
( كبرج وينه / يزهره انشد )
(مضيعينه /. احبابج ليش )
ودلينه. /. اضهر. يالمهدي )

،،،،،
✍️ ام زينب كربلاء غير مبرئ الذمه من يأخذ الكلام وينسبه له او حذف الاسم  القصيده من كتاب المآسي الفاطميه الجزء التاسع والثلاثين


https://t.me/Um_Zainab_Kar

لطميه لزهراء ع تعازي للامام الحجه عج

نعازيك
يالمهدي بمصاب امك نعازيك
ندري بالضلع والباب ياذيك
جينه اليوم عالزهره نواسيك
.............
يالمهدي الك / ننصب عزه /ونار الكلب سريه
ندري بحزن / كلبك كثر / من تذكر الزجيه
يجري الدمع / وعله الضلع / وعيونك الجريه
لمن تحل / يالمنتضر / ليالي الفاطميه

يحزنون
الك شيعه بمصاب امك يحزنون
عله الهامات يزهره يالطمون
يمته الثار يالمهدي يصيحون
.............
يمته الفرج / ياسيدي / عين المحب تتاني
نارالضلع / ماتنطفي / ومن هظمتك تعاني
جنك صحت / وبحسرتك /دهر الغدر جواني
يايمه الج/ ناصب عزه/ صواب الضلع عماني

تتانين يايوم الفرج يمه تتانين
بعده الضلع يوجعني تصيحين
سطرني المايخاف الله عله العين
..........
اشكي الك/هظم العده/ وضيم الجره وعذابي
ما ينسه / ذاك الوكف / وتجسر عله بابي
محسن وكع/انه اصرخت/ يامحنتي ومصابي
شحجي بعد/ عن الجره/ وعله الزمن عتابي

ولاطاب
جرح امك يضل يدي ولاطاب
تضل الالام ضلعي وعصرة الباب
خل تنصب عزيه وتبجي الاحباب
.............
خلها تون / لمصيبتي/ وتذكر اشجرالي
يوم العفت/ زينب تون /بصرخه ودمع يلالي
من حملت/ حيل اصرخت/ يم الحسن تعالي
يوجع تره / جرح اليتم / وكل البجه حلالي
يالدموع
هلن من دمه عليها يالدموع
مشت وصوابها موجر بالضلوع
عافتني بحزن والكلب مشلوع
...........
وينه الندب/ يافاطمه / ماينجبر كسرنه
عالخد يهل / يم الحسن / لمصيبتج دمعنه
كلما يمر / ذكرى الضلع / ماتم حزن نصبنه
يجري الدمع /يالمهدي الك/ ليمت يحل فرجنه
والونين
كضينه العمر بالهم والونين
يراعي الثار وتهل دمعة العين
بكل ماتم نصيح بصوت يحسين
،،،،،،،،



نعي لزهراء ع

جاليش صار بليل ممشاج
مستعجله وما عطليناج
ماحمليتي البزر وياج
اهنا حبيبه اهنا يمه
.............
ارد اعتاتبه ليل الخذه امي
زود ونيني وكثر همي
يامن عساها العين تعمي
............
بالشوف شلجن ياعيوني
محملين بأمي وماخذوني
ويه الوالده ماحملوني
..........
يدروبجن بعدت عليه
يايمه رد الصوت ليه
ريضيلنه نحمل سويه
.............
يامن مشيت تريضلنه
يجناز ريض حيل صحنه
ونريد ويه ام المحنه

..............
ياليل ماترحم بجينه
يالحملت بامنه الحنينه
طش الضعن وتفاركينه
...........
ياليل وجه امي خذيته
وكلب اليحبنه باعديته
حنان امي عليه ضيعيته
..........
ياليل كلبي مارحمته
صوتي الوراها ماسمعته
عني خذيت امي بسكته
..........
ارد اعاتب اليل الخذاها
ليش بظلامه حملاها
وازغارها تصرخ وراها
..........
ياليل الخذاها مارحمنه
انصيحله وماريضلنه
يجناز وين تريد بامنه
.........
يجناز بامنه ماتوانيت
خليتنه بدار واكفيت
يافراكها وياوحشة البيت
وين اليودنك يكلبي

أم زينب كربلاء غير مبري الذمه من ياخذ الكلام او يحذف الاسم القصيده من كتاب الماسي الفاطميه الحزء السادس والثلاثين


https://telegram.me/um_zainab_kar telgram

صدر حديثاً 🔥🔥🔥

ديوان ماسي ام البنين ج٤

خاص،،بالسيدة ام البنين ع
👇🏻للحجز واتساب
👉07746504915👈

أو للحجز على تليكرام👇

👉@ABRAR5325👈


كروب لبيع الأجهزة والكتب الحسينية👇

https://whatsapp.com/channel/0029VbCJxhu8qIznqdRxtD2D