Ministry of Revenues -Medium Taxpayers Branch No2

በኮሚሽን እና በጅምላ ንግድ ስርጭት ላይ የሚከፈለው አማራጭ አነስተኛ ግብር (Minimum Alternative Tax)
1. የንግድ ወኪሎች (Commercial Agents)
እቃዎችን ወይም አገልግሎቶችን ከአስመጪ፣ ከአምራች ወይም ከሌላ አገልግሎት ሰጪ በውክልና ተረክበው በወካያቸው ስም የሚሸጡ እና የሸጡበትን ዋጋ ለወካያቸው የሚያስረክቡ የንግድ ወኪሎች፤ አማራጭ አነስተኛ ግብር የሚከፍሉት በሚያገኙት የኮሚሽን ክፍያ ላይ  ነው።
2. የጅምላ ሻጮች እና የኅዳግ (Margin) ስሌት
የጅምላ ንግድ ፈቃድ ያላቸው ግብር ከፋዮች ከአምራቹ፣ ከአስመጪው ወይም ከሌላ ጅምላ ሻጭ ጋር ባደረጉት ውል መሰረት ለቸርቻሪዎች ወይም ለሌሎች ጅምላ ሻጮች በሚሸጡበት ጊዜ ከሽያጩ የሚኖራቸው ድርሻ (Margin) በውል በመቶኛ የተወሰነ ከሆነ፤ አማራጭ አነስተኛ ግብሩ የሚሰላው በሚከፈላቸው መቶኛ ላይ ይሆናል።
አምራቹ/አስመጪው እና ጅምላ ሻጩ የችርቻሮ መሸጫ ዋጋውን እና የኅዳግ/የኮሚሽን መጠኑን በውል ከወሰኑ፣ የታክስ ባለሥልጣኑ ሂሳብ ሲመረምር እነዚህን ውሎች በአንድነት ማየት አለበት።
3. የሰነድ አቀራረብ እና ማረጋገጫ ግዴታ
በውል የተወሰነውን መቶኛ መሰረት አድርጎ ግብር ለማስላት የሚከተሉት ሕጋዊ ሰነዶች ለታክስ ባለሥልጣኑ ቀርበው መመረመር ይኖርባቸዋል፡
አከፋፋዩ ከአምራቹ ወይም ከአስመጪው የገዛበትን ዋጋ የሚያሳይ ደረሰኝ፣
ለቸርቻሪዎች ወይም ለሌሎች ወገኖች ሽያጭ የፈጸመበት ሕጋዊ ደረሰኝ፣
ለጉዳዩ አስፈላጊ የሆኑ ሌሎች የሂሳብ ሰነዶች።
4. የሰነድ ማረጋገጫ ካልተገኘ ወይም ከስምምነት ውጪ ከተከናወነ
የቀረቡት ሰነዶች ምርቱ ወይም አገልግሎቱ በአምራቹ/አስመጪው በተወሰነው የዋጋ ገደብ መሰረት መሸጡን ማረጋገጥ ካልቻሉ፣ ወይም ከስምምነት ውጪ ግብይት መፈጸሙ ከተረጋገጠ፤ የታክስ ባለሥልጣኑ አማራጭ አነስተኛ ግብሩን በግብር ከፋዩ ዓመታዊ ሽያጭ ላይ መሰረት በማድረግ ተፈፃሚ ያደርጋል።
ሕጉን ጥሶ በሌላ ዋጋ ወይም ከስምምነት ውጭ ግብይት ፈጽሞ የነበረ ግብር ከፋይ በሂሳብ ምርመራ ወቅት ከተገኘ፣ ቀደም ሲል ተከፍሎ የነበረው ግብር በታክስ አስተዳደር አዋጁ መሠረት እንደገና ተሰልቶ ልዩነቱ በግብር ከፋዩ እንዲከፍል ይደረጋል።
*ለተጨማሪ መረጃ የገቢ ግብር ደንብ ማሻሻያ ደንብ ቁጥር 597/2019 ይመልከቱ
ግብር÷ ለሃገር ክብር!

ወቅታዊ፣ ትኩስ እና የተሟሉ መረጃዎችን ለማግኘት፡-
ቴሌግራም፦ https://t.me/mormto2
ፌስቡክ፡- https://web.facebook.com/info.mto2/
ቲክቶክ፡- https://www.tiktok.com/@mto2education
ኢሜል፡- mormto2taxeducation2023@gmail.com
ዩትዩብ፡- https://www.youtube.com/@ministryofRevenues-MTO2

የገቢዎች ሚኒስቴር ከፍተኛ አመራሮች በቅርንጫፍ ጽ/ቤቱ ይፋዊ የሥራ ጉብኝት አደረጉ
*********************
ህዳር 3 ቀን 2019ዓ.ም
በገቢዎች ሚኒስቴር በቅርቡ የታክስ ኦፕሬሽን ዘርፍ ሚኒስትር ዴኤታ ሆነው የተሾሙት ዶ/ር ታምራት በየነ ከሚኒስቴር መሥሪያ ቤቱ ከፍተኛ አመራሮች ጋር በመሆን በመካከለኛ ግብር ከፋዮች ቁጥር 2 ቅርንጫፍ ጽ/ቤት በመገኘት ይፋዊ የሥራ ጉብኝት እና ምልከታ አካሄዱ።
 
ከፍተኛ አመራሮቹ ቅርንጫፍ ጽ/ቤቱ ሲደርሱ በቅርንጫፍ ጽ/ቤቱ አመራሮች እና ሠራተኞች ደማቅ አቀባበል ተደርጎላቸዋል። በጉብኝቱ ወቅትም የቅርንጫፍ ጽ/ቤቱ ዋና ሥራ አስኪያጅ ወ/ሮ ሂሩት መብራቴ ቅርንጫፍ ጽ/ቤቱ  ከምሥረታ ጀምሮ እስካሁን ድረስ ያከናወናቸውን ዋና ዋና ተግባራት እና የአፈጻጸም ሂደቶች አስመልክቶ ዝርዝር ሪፖርት አቅርበዋል።
 
ወ/ሮ ሂሩት በሪፖርታቸው እንደገለጹት፤ ቅርንጫፍ ጽ/ቤቱ ለግብር ከፋዩ ቀልጣፋ፣ ዘመናዊና በዲጂታል ቴክኖሎጂ የተደገፈ አገልግሎት ለመስጠት በትኩረት እየሠራ ይገኛል። በተለይም ግብር ከፋዮች ተቋሙ በዘረጋቸው የኢ-ታክስ (e-Tax)፣ የኢ-ፔይመንት (e-Payment) እና የቴሌብር የክፍያ አማራጮች በመጠቀም ግብራቸውን በወቅቱ እንዲያሳውቁና እንዲከፍሉ የተጠናከረ ክትትልና ድጋፍ በመደረጉ አበረታች ውጤት መመዝገቡን አብራርተዋል።
 
አያይዘውም የቅርንጫፍ ጽ/ቤቱን የ2019 በጀት ዓመት የአራት ወራት የገቢ አፈጻጸም ሲያቀርቡ፤ በዚህ አራት ወራት  13.82 ቢሊየን  ለመሰብሰብ ታቅዶ 13.86 ቢሊየን ብር በመሰብሰብ የዕቅዱን 100.27 በመቶ ማሳካት መቻሉን አስታዉቀዋል።
 
ሪፖርቱን መነሻ በማድረግ ከተሳታፊዎች የተለያዩ ገንቢ ሃሳቦችና አስተያየቶች ተነስተው ውይይት ተደርጎባቸዋል።
 
በመድረኩ ማጠቃለያ ላይ ንግግር ያደረጉት የገቢዎች ሚኒስቴር የታክስ ኦፕሬሽን ዘርፍ ሚኒስትር ዴኤታ ዶ/ር ታምራት በየነ፤ በቅርንጫፍ ጽ/ቤቱ ለተደረገላቸው ደማቅ አቀባበል ልባዊ ምስጋናቸውን አቅርበዋል። ቅርንጫፍ ጽ/ቤቱ ያስመዘገበውን የላቀ የገቢ አፈጻጸም ያደነቁት ሚኒስትር ዴኤታው፤ ኢትዮጵያ የሚገባትንና የሚመጥናት የኢኮኖሚ ልዕልና እንድትጎናጸፍ የገቢ አሰባሰብ ሥርዓቱን ማጠናከር ወሳኝ ሚና እንዳለው አስገንዝበዋል። በቀጣይም ቅርንጫፍ ጽ/ቤቱ የጀመራቸውን ስኬታማ ሥራዎች አጠናክሮ እንዲቀጥል በበኩላቸው የሚቻላቸውን ሁሉ ድጋፍ ለማድረግ ዝግጁ መሆናቸውን አረጋግጠዋል።
 
በመጨረሻም ዶ/ር ታምራት በየነ እና ከፍተኛ አመራሮቹ በቅርንጫፍ ጽ/ቤቱ የሚገኙ ልዩ ልዩ የሥራ ክፍሎችን በመዘዋወር የዕለት ተዕለት የአገልግሎት አሰጣጥ እና የሥራ እንቅስቃሴን ተመልክተዋል።
 
ግብር÷ ለሃገር ክብር!

ወቅታዊ፣ ትኩስ እና የተሟሉ መረጃዎችን ለማግኘት፡-
ቴሌግራም፦ https://t.me/mormto2
ፌስቡክ፡- https://web.facebook.com/info.mto2/
ቲክቶክ፡- https://www.tiktok.com/@mto2education
ኢሜል፡- mormto2taxeducation2023@gmail.com
ዩትዩብ፡- https://www.youtube.com/@ministryofRevenues-MTO2