ميرزا عادل أشكناني

طبع الأبو لو فارگ الحياةْ
يوصِّي على ابنَيْتَه .. عُگب فَـيْـتَـــه
واشلون لو چان الأبو الرسولْ !؟
واشلون لو چانت الزهره ابْنَـيْـتَه !؟
ــــــــــــ
يِمُوت .. بس گلبه يحِن
عاللّي تظل عُگبه يتيمه
يِمُوت .. او جسمه يندفِن
او روحه تصير اعْليها خيمه

اشحال الرّسولْ .. و ابنَيْـتـه ما بين الغرُب
و اهيَه البتول .. يم گبره تبچي او تنضرُب

تلثِم تُرابه او تِنادي آه .. وا غوثاه .. أدركني
و اتنادي وا محمدَّاهْ .. وا أبتاهْ .. أدركني
او ردِّ الصَّده وا محمدَّاهْ .. وا أبتاهْ .. أدركني

دار .. وحْي الله او حرگوها الدّار
يالغارس خير ابهالأمة غرسولي ابصدري البسمار
نار .. وينك ياللّي اتطفّي النار !
اتلوذ اِبنيْتك من الگوم او مابيهم واحد نغّار

قصدوني و آنه ابفاتِحة مُصابي
او رادوا يبويه ينهتِك حِجابي
لكنَّني لذتُ وراءَ البابِ

ويل .. من عقبك راوُوني الويل
ردتك سدِّ ابوجه أنذال اعْليه انهدَّوا هدَّة سيل
حيل .. وينك ياللي اتشدِّ الحيل
عشْت اخلافك ظيم او غربه الصارت بيها أيَّامي ليل


وا أبتاهْ .. وا أبتاهْ
وا أبتاهْ .. وا محمَّداه

****

طبع الأبو لو فارگ الحياةْ
يوصِّي على ابنَيْتَه .. عُگب فَـيْـتَـــه
واشلون لو چان الأبو الحُسين !؟
واشلون لو چانت رُقيَّه ابْنَـيْـتَه !؟
ــــــــــــ
يِمُوت .. بس گلبه يحِن
عاللّي تظل عُگبه يتيمه
يِمُوت .. او جسمه ابلا دفِن
او راسه يصير اعْليها خيمه

اشحال الذّبيح .. و ابنَيْـتـه ما بين الغُرب
اتقوم او تطيح .. يم نحره تبچي او تنضرُب

تلثِم وريده او تِنادي آه .. وا أبتاه .. أدركني
و اتنادي وا محمدَّاهْ .. و جدَّاه .. أدركني
او ردِّ الصَّده وا محمدَّاهْ .. و جدَّاه .. أدركني

دار .. خيل او عسكر بينه اندار
چانك حيْ يا بويه أدركني شرْكض و اتراب الطّف حار
نار .. وينك ياللّي اتطفّي النار !
اتلوذ اِبنيْتك من الگوم او مابيهم واحد نغّار

و العسكر اعله اخيامنا تگرَّب
رادوا يبويه اسْاورتي تتسلَّب
لكنَّني لذتُ وراءَ زينب

ويل .. من عقبك راوُوني الويل
السلّاب ايهد ابكل حيله او جسْمي الناحل ما بي حيل
خيل .. وينك ياللي اتردِّ الخيل
فرهود او ما ظلّت خيمه بيها انبات ابهذا الليل

وا أبتاهْ .. وا أبتاهْ
وا أبتاهْ .. وا حُسيناهْ

وا يُتماه ..
وا ويلاه ..
وا عطشاه ..
وا غُربتاهْ ..
___
طبْع الأبو
ميرزا عادل أشكناني
جمادي الأولى 1448 هـ

*[ طبع الأبو ]*

اداء: الملا #محمد_باقر_الخاقاني
كلمات: الشاعر #الميرزا_عادل_أشكناني

https://youtu.be/9rOrkwQm8HE

مجالس عزاء الليالي الفاطمية 1448 هـ - 2026 م
ليالي إستشهاد سيدة الوجود الصديقة الطاهرة الكبرى فاطمة الزهراء صلوات الله عليها وآلها
عزاء مضيف قمر بني هاشم عليه السلام - العراق - بغداد

مونتاج وتنفيذ: الكافل ميديا للإنتاج الحسيني

اللَّهُمَّ عَجِّلْ لِوَلِيِّكَ الفَرَج